ადამიანის შარდის გამომყოფი სისტემა მოიცავს: თირკმელებს, შარდსაწვეთებს, შარდის ბუშტსა და შარდსადენს. მისი ძირითადი ფუნქციაა სისხლის გაფილტვრა, ორგანიზმიდან ნარჩენი ნივთიერებებისა და ზედმეტი სითხის გამოყოფა. ნარჩენი ნივთიერებები იქცევა შარდად, რომელიც ნორმალურ პირობებში სტერილურ სითხეს წარმოადგენს. შარდს გამოიმუშავებს თირკმელები. თირკმელებში წარმოქმნილი შარდი შარდსაწვეთების გზით შარდის ბუშტში ჩაედინება, რომელიც შარდსადენის გავლით გამოიყოფა ორგანიზმიდან. საშარდე სისტემის ყველაზე გავრცელებულ პრობლემას ზედა და ქვედა საშარდე გზების ინფექციები წარმოადგენს. საშარდე გზების ინფექციებს იწვევენ სხვადასხვა მიკროორგანიზმები, რომლებიც აღწევენ საშარდე გზებამდე, შემდეგ მრავლდებიან და დროთა განმავლობაში თირკმელებისა და საშარდე გზების ნორმალურ ფუნქციონირებას არღვევენ. საშარდე გზების ინფექციების სიხშირე დამოკიდებულია სქესსა და ასაკზე.

შარდის ბაქტერიოლოგიური გამოკვლევა ლაბორატორიული კვლევაა, რომელიც გამოიყენება საშარდე გზების ინფექციის გამოსავლენად. გამოკვლევის შედეგად ხდება ინფექციის გამომწვევი ბაქტერიების იდენტიფიცირება. გამოყოფილ ორგანიზმზე ტარდება ანტიბიოტიკების მიმართ მგრძნობელობის დადგენა, რაც ხელს უწყობს ექიმს სწორად შეარჩიოს ანტიბიოტიკი, რაც დროულად გამოჯანმრთელების წინაპირობაა. არასწორად მიღებული ანტიბიოტიკი კი იწვევს ანტიბიოტიკისადმი რეზისტენტობას, რაც დღესდღეობით თანამედროვე მედიცინის გამოწვევაა.

ყოველივე ამის გათვალისწინებით, საშარდე გზების ინფექციების დიაგნოსტირებისა და მკურნალობისთვის შარდის ბაქტერიოლოგიურ გამოკვლევას უდიდესი როლი ენიჭება.