კვლევის შესახებ
Coxiella burnetii-ის (Q ცხელება) ფაზა II-ის საწინააღმდეგო IgM ანტისხეულების განსაზღვრა სისხლში (Coxiella burnetii Phase II IgM) არის სისხლის შრატის სეროლოგიური კვლევა, რომელიც სისხლის შრატში ავლენს Coxiella burnetii-ის ფაზა II ანტიგენის მიმართ წარმოქმნილ M კლასის (IgM) ანტისხეულებს.
Coxiella burnetii იწვევს ზოონოზურ დაავადებას - Q ცხელებას. ადამიანი ინფიცირდება ინფიცირებული ცხოველებიდან (ცხვარი, თხა, საქონელი) წარმოქმნილი მტვრისა და გამონაყოფების ჩასუნთქვით. დაავადება შესაძლოა მიმდინარეობდეს მსუბუქად ან მძიმე ფორმით (პნევმონია, ჰეპატიტი, ინფექციური ენდოკარდიტი).
M კლასის (IgM) ანტისხეულები ინფექციის საპასუხოდ პირველად გამომუშავდება და ჩვეულებრივ ჩნდება სიმპტომების დაწყებიდან 1–2 კვირაში, რაც მათ მიმდინარე (მწვავე) Q ცხელების მარკერად აქცევს. ფაზა II ანტისხეულები მწვავე ინფექციაში ჭარბობს ფაზა I ანტისხეულებთან შედარებით.მხოლოდ ფაზა II IgM-ის დადებითი შედეგი ცოტა ხნით აღებულ ერთ ნიმუშში ყოველთვის არ ადასტურებს მწვავე ინფექციას, ამიტომ მისი ინტერპრეტაცია ხდება ფაზა II IgG-სა და კლინიკურ მონაცემებთან ერთად.
რა შემთხვევაში უნდა ჩაიტაროთ კვლევა?
კვლევის ჩატარება რეკომენდებულია შემდეგ შემთხვევებში:
• მწვავე Q ცხელების ეჭვი - გაურკვეველი წარმოშობის ცხელება, თავისა და კუნთების ძლიერი ტკივილი, ატიპიური პნევმონია ან ჰეპატიტი;
• ცხოველებთან კონტაქტის ან მაღალი რისკის პროფესიის (ფერმერი, ვეტერინარი, სასაკლაოს მუშა) მქონე პირები ცხელების ფონზე;
• მწვავე ცხელებითი დაავადება სოფლად ან მეცხოველეობის რეგიონში ყოფნის ფონზე;
• ინფექციის ადრეული ფაზის შეფასება ფაზა II IgG-სთან ერთად;
• ცოტა ხნის წინ განვითარებული ინფექციის გამოკვლევა, როდესაც IgG ანტისხეულებს ჯერ არ მოუსწრიათ მკვეთრად მომატება.
ინტერპრეტაცია
ფაზა II IgM-ის დადებითი (მომატებული) შედეგი შესაძლოა მიუთითებდეს:
• მწვავე (ახლო პერიოდში განვითარებულ) Q ცხელებაზე, განსაკუთრებით – ფაზა II IgG-ის ერთდროულ მატებასთან ერთად.
IgM ანტისხეულები შესაძლოა ხანგრძლივად (ზოგჯერ ერთ წელზე მეტ ხანს) შენარჩუნდეს, ასევე – მისცეს ცრუ დადებითი შედეგი (მაგ., რევმატოიდული ფაქტორის არსებობისას). ამიტომ მხოლოდ IgM-ის დადებითი მაჩვენებელი ერთ ნიმუშში არ არის საკმარისი მწვავე ინფექციის დასადასტურებლად და საჭიროებს განმეორებით (დაწყვილებულ) გამოკვლევას.
ფაზა II IgM-ის უარყოფითი (ნორმალური) შედეგი შესაძლოა მიუთითებდეს:
• Q ცხელების ინფექციის არარსებობაზე;
• ინფექციის ძალიან ადრეულ ეტაპზე, როდესაც ანტისხეულებს ჯერ არ მოუსწრიათ გამომუშავება (კლინიკური ეჭვის შენარჩუნებისას რეკომენდებულია კვლევის განმეორება 2–3 კვირის შემდეგ).
ლაბორატორიული კვლევის შედეგები ყოველთვის უნდა შეფასდეს ექიმის მიერ პაციენტის კლინიკურ მონაცემებთან (ანამნეზურ მონაცემებთან) და სხვა გამოკვლევების შედეგებთან ერთად.
კვლევასთან ერთად ასევე ხშირად იტარებენ შემდეგ გამოკვლევებს:
• Coxiella burnetii-ის დნმ-ის განსაზღვრა PCR მეთოდით (Coxiella burnetii DNA, PCR);
• სისხლის საერთო ანალიზი, ედს (CBC+ESR);
• C-რეაქტიული ცილის განსაზღვრა სისხლის შრატში, რაოდენობრივი (CRP);
• ალანინამინოტრანსფერაზისა და ასპარტატამინოტრანსფერაზის განსაზღვრა სისხლში (ALT,AST);
• ღვიძლის ფუნქციური სინჯები (ALT, AST, GGT, ALP, TBIL, DBIL).
როგორ მოვემზადოთ კვლევისთვის?
კვლევისთვის სპეციფიური მომზადება არ არის საჭირო.
მასალის ტიპი
კვლევის შესრულების დრო
ქვეყანა
ავტორი და წყარო
გამოყენებული წყაროები:
• cdc.gov - Clinical and Laboratory Diagnosis for Q Fever
• aruplab.com - Coxiella burnetii (Q-Fever) Antibodies, IgG and IgM, Phase I and II
• ncbi.nlm.nih.gov - Antibody Response to Phase II Antigen in Acute Q Fever
• ნინო ღულათავა - სამედიცინო დირექტორი;
• ნინო მურადაშვილი - ჰემატოლოგიის, ბიოქიმიის და იმუნოლოგიის მიმართულების ხელმძღვანელი;
• ლევან არჯევანიძე - კომერციული დირექტორი.
