ვიტამინი B12 (კობალამინი) წყალში ხსნადი ვიტამინია, რომელიც აუცილებელია ჰემატოპოეზისა (სისხლის წარმოქმნა) და ნეირონების ნორმალური ფუნქციონირებისთვის. ადამიანის ორგანიზმს არ შეუძლია მისი სინთეზი და ის ორგანიზმში საკვებთან ერთად ხვდება. B12-ით მდიდარია რძის პროდუქტები, კვერცხი, თევზი, ქათამი, მარცვლეული. ორგანიზმი ძალიან ეკონომიურად იყენებს ვიტამინ B12-ის მარაგს. ვიტამინი B12 ადამიანის ორგანიზმში შემდეგ ფუნქციებს ასრულებს: მონაწილეობს მიელინის გარსების ფორმირებაში, აუცილებელია ერითროციტების წარმოქმნისა და ანემიის პრევენციისთვის, მონაწილეობს დნმ-ის სინთეზში, მეტაბოლიზმის პროცესებში და ჰომოცისტეინის ცვლაში. B12 კოფაქტორია ენზიმისთვის, რომელიც ჰომოცისტეინს გარდაქმნის მეთიონინად. B 12-ის დეფიციტისას სისხლში გროვდება ჰომოცისტეინი და ზრდის გულ-სისხლძარღვთა დაავადებების რისკს.

ვიტამინი B12-ის დეფიციტი შეიძლება გამოწვეული იყოს კუჭის ლორწოვანი გარსის მიერ შინაგანი ფაქტორის (IF) სეკრეციის ნაკლებობით (გასტრექტომია, კუჭის ატროფია) ან ნაწლავის მალაბსორბციით (ნაწლავის რეზექცია, წვრილი ნაწლავის დაავადებები).

ვიტამინი B12 დეფიციტი ხშირად იწვევს მაკროციტურ ანემიას, გლოსიტს, პერიფერიულ ნეიროპათიას, სისუსტეს, ჰიპერრეფლექსიას, ატაქსიას, პროპრიოცეფციის დაკარგვას, ცუდი კოორდინაციისა და ემოციური ქცევის ცვლილებებს. ეს გამოვლინებები შეიძლება მოხდეს ნებისმიერ კომბინაციაში.