კვლევის შესახებ
A ჰეპატიტის ვირუსის საწინააღმდეგო IgG ანტისხეულები (anti-HAV IgG) არის სისხლის შრატის ლაბორატორიული კვლევა, რომელიც ავლენს A ჰეპატიტის ვირუსის (HAV) წინააღმდეგ გამომუშავებულ G კლასის ანტისხეულებს.
A ჰეპატიტი ღვიძლის ანთებითი დაავადებაა, რომელიც ფეკალურ-ორალური გზით - დაბინძურებული საკვების ან წყლის, ან ინფიცირებულ ადამიანთან მჭიდრო კონტაქტის მეშვეობით - გადაეცემა. დაავადება, როგორც წესი, თავისთავად გაივლის და ქრონიკულ ფორმაში არ გადადის.
IgG კლასის ანტისხეულები ჩნდება დაავადების რეკონვალესცენციის ფაზაში და მთელი ცხოვრების განმავლობაში ნარჩუნდება. ისინი ან წარსულში გადატანილ ინფექციაზე, ან ვაქცინაციით მიღებულ სტაბილურ იმუნიტეტზე მიუთითებენ. ამიტომ anti-HAV IgG ძირითადად გამოიყენება იმუნიტეტის (დაცვის) შესაფასებლად და არა მწვავე ინფექციის დიაგნოსტიკისთვის.anti-HAV IgG დადებითი შედეგი ჩვეულებრივ ნიშნავს, რომ ადამიანი დაცულია A ჰეპატიტისგან - ან გადატანილი ინფექციის, ან ვაქცინაციის შედეგად.
რა შემთხვევაში უნდა ჩაიტაროთ კვლევა?
კვლევის ჩატარება რეკომენდებულია შემდეგ შემთხვევებში:
• A ჰეპატიტის მიმართ იმუნიტეტის (დაცვის) შეფასება;
• ვაქცინაციის საჭიროების დადგენა (განსაკუთრებით რისკის ჯგუფებში);
• ვაქცინაციის ან გადატანილი ინფექციის შემდეგ იმუნური პასუხის დადასტურება;
• მწვავე ჰეპატიტის სიმპტომების შეფასება IgM-თან ერთად (გადატანილი და მიმდინარე ინფექციის გასარჩევად);
• ეპიდემიოლოგიური კვლევები და რისკის ჯგუფების სკრინინგი;
• ღვიძლის ქრონიკული დაავადების მქონე პაციენტებში A ჰეპატიტის მიმართ დაცვის შემოწმება.
ინტერპრეტაცია
anti-HAV IgG დადებითი (მომატებული):
• მიუთითებს A ჰეპატიტის მიმართ იმუნიტეტზე - წარსულში გადატანილ ინფექციაზე ან წარმატებულ ვაქცინაციაზე;
• ასეთი ადამიანი, როგორც წესი, დაცულია განმეორებითი ინფიცირებისგან;
• თუ ერთდროულად დადებითია anti-HAV IgM, ეს მიუთითებს მიმდინარე ან ახლო პერიოდში გადატანილ მწვავე ინფექციაზე.
anti-HAV IgG უარყოფითი (არ არის გამოვლენილი):
• ნიშნავს, რომ ადამიანს არ აქვს A ჰეპატიტის მიმართ იმუნიტეტი;
• ასეთ პირებს, რისკის არსებობის შემთხვევაში, შესაძლოა ესაჭიროებოდეთ ვაქცინაცია.
მნიშვნელოვანია: მხოლოდ IgG (IgM-ის გარეშე) მწვავე დაავადების დიაგნოსტიკისთვის არ გამოდგება - ის ასახავს წარსულ კონტაქტს ან იმუნიტეტს.
ლაბორატორიული კვლევის შედეგები ყოველთვის უნდა შეფასდეს ექიმის მიერ პაციენტის კლინიკურ მონაცემებთან (ანამნეზურ მონაცემებთან) და სხვა გამოკვლევების შედეგებთან ერთად.
კვლევასთან ერთად ასევე ხშირად იტარებენ შემდეგ გამოკვლევებს:
• A ჰეპატიტის ვირუსის საწინააღმდეგო IgM ანტისხეულები (HAV IgM);
• B ჰეპატიტის ვირუსის ზედაპირული ანტიგენის განსაზღვრა სისხლში (HBsAg);
• B ჰეპატიტის ვირუსის ზედაპირული ანტიგენის საწინააღმდეგო ანტისხეულების განსაზღვრა სისხლში (anti-HBs);
• C ჰეპატიტის ვირუსის საწინააღმდეგო ანტისხეულების განსაზღვრა სისხლში (anti-HCV);
• ღვიძლის ფუნქციური სინჯები (ALT, AST, GGT, ALP, TBIL, DBIL);
როგორ მოვემზადოთ კვლევისთვის?
კვლევისთვის სპეციფიური მომზადება არ არის საჭირო.
მასალის ტიპი
კვლევის შესრულების დრო
ქვეყანა
ავტორი და წყარო
გამოყენებული წყაროები:
• cdc.gov - Clinical Screening and Diagnosis for Hepatitis A
• medlineplus.gov - Hepatitis Testing
• ნინო ღულათავა - სამედიცინო დირექტორი;
• ნინო მურადაშვილი - ჰემატოლოგიის, ბიოქიმიის და იმუნოლოგიის მიმართულების ხელმძღვანელი;
• ლევან არჯევანიძე - კომერციული დირექტორი.
