ესტროგენი (Estrogen) არის სასქესო ჰორმონი, რომელიც აუცილებელია სექსუალური, რეპროდუქციული და ზოგადი ჯანმრთელობის შენარჩუნებაში. ესტროგენის დონე ბუნებრივად მერყეობს მენსტრუალური ციკლის დროს და მცირდება მენოპაუზის პერიოდში. ადამიანის ორგანიზმში გხვდება 3 ძირითადი ბიოლოგიურად აქტიური ესტროგენი - ესტრონი (E1), ესტრადიოლი (E2, 17-β ესტრადიოლი) და ესტრიოლი (E3).

ესტრადიოლი (Estradiol) ყველაზე აქტიური ესტროგენი. E2 უპირატესად საკვერცხეებში სინთეზირდება, ხოლო მისი მცირე რაოდენობა წარმოიქმნება თირკმელზედა ჯირკვლის ქერქში. ესტროგენები პროგესტერონთან ერთად არეგულირებს მენსტრუალურ ციკლს, მონაწილეობენ ქალის სასქესო ორგანოების, მეორადი სასქესო ნიშნების, ნაყოფიერების განვითარებასა და შენარჩუნებაში. ის ასევე გავლენას ახდენს კალციუმის ცვლაზე და მოქმედებს ძვლის მეტაბოლიზმზე. ესტროგენების დაბალი დონის დროს აღინიშნება ძვლის მინერალიზაციის შემცირება, რაც იწვევს მოტეხილობების ადვილად განვითარებას და ოსტეოპოროზს პოსტმენოპაუზურ პერიოდში. ესტრადიოლის კონცენტრაცია იცვლება მენსტრუალური ციკლის ფაზების მიხედვით.

მამაკაცებში აღნიშნული ჰორმონის მცირე რაოდენობა სეკრეტირდება თირკმელზედა ჯირკვლების, სათესლე ჯირკვლებისა და პერიფერიული ქსოვილის მიერ, ანდროგენების გარდაქმნის შემდეგ.

სისხლში E2 განსაზღვრა წარმოადგენს ქალებში რეპროდუქციული ფუნქციის შეფასების განუყოფელ ნაწილს და გამოიყენება უნაყოფობის, ოლიგო-ამენორეის და მენოპაუზის სტატუსის შეფასებისთვის. გარდა ამისა, ის ფართოდ გამოიყენება ოვულაციის ინდუქციის მონიტორინგისთვის, ასევე "ინ ვიტრო" განაყოფიერებისთვის მომზადების დროს.