ჰელიკობაქტერ პილორის საწინააღმდეგო IgG ანტისხეულების განსაზღვრა სისხლში (Helicobacter pylori IgG)

ფასი: 30 ₾

კვლევის შესახებ

Helicobacter pylori IgG არის G კლასის იმუნოგლობულინი, რომელიც წარმოიქმნება ორგანიზმში H. pylori-ის ინფექციის საპასუხოდ და მიანიშნებს გამოვლილ ან მიმდინარე ინფიცირებაზე.

Helicobacter pylori გრამუარყოფითი, სპირალისებრი ბაქტერიაა, რომელიც კუჭის ლორწოვანს კოლონიზირებს და არის ქრონიკული გასტრიტის, კუჭისა და თორმეტგოჯა ნაწლავის წყლულოვანი დაავადების, კუჭის MALT-ლიმფომისა და კუჭის ადენოკარცინომის ძირითადი გამომწვევი. ჯანმო-ს მიერ ის კლასიფიცირებულია I კატეგორიის კანცეროგენად.

IgG ანტისხეულების დონე სისხლში იმატებს ინფიცირების 3-4 კვირის შემდეგ და შესაძლოა გრძელვადიანად (წლები) შენარჩუნდეს, ამიტომ დადებითი IgG შედეგი არ ნიშნავს აუცილებლად აქტიურ ინფექციას - ის შესაძლოა ასახავდეს ადრე გამოვლილ, უკვე ერადიცირებულ ინფექციასაც. ამის გამო, სეროლოგიური მეთოდი უფრო ხშირად გამოიყენება სკრინინგის მიზნით, ხოლო აქტიური ინფექციის დადასტურებისთვის რეკომენდებულია განავალში ანტიგენის გამოვლენა, 13C-ურეაზური სასუნთქი ტესტი ან ენდოსკოპიური ბიოფსია.

რა შემთხვევაში უნდა ჩაიტაროთ კვლევა?

კვლევის ჩატარება რეკომენდებულია შემდეგ შემთხვევებში:

• დისპეფსია, ეპიგასტრული ტკივილი;

• გულძმარვა, ბოყინი, გულისრევა;

• კუჭისა და თორმეტგოჯა ნაწლავის წყლულოვანი დაავადების ეჭვი;

• ქრონიკული გასტრიტის დიაგნოსტიკა;

• H. pylori-სთან ასოცირებული პათოლოგიების ოჯახური ანამნეზი;

• გაურკვეველი ეტიოლოგიის რკინადეფიციტური ანემია;

• იდიოპათიური თრომბოციტოპენიური პურპურა (ITP);

• H. pylori-ის ინფექციის სკრინინგი;

• კუჭის კიბოს მაღალი რისკის ჯგუფები.

ინტერპრეტაცია

კვლევის შედეგი შეიძლება იყოს:

• დადებითი (Positive) - მიუთითებს H. pylori-თან კონტაქტზე: მიმდინარე ან გადატანილი ინფექცია. დადებითი შედეგი არ განასხვავებს აქტიურ და წარსულში გამოვლილ ინფექციას, რადგან IgG ანტისხეულები სისხლში გრძელვადიანად ინარჩუნებენ მაღალ დონეს (თვეები და წლებიც). დასაზუსტებლად რეკომენდებულია განავალში ანტიგენის ან 13C-ურეაზური სასუნთქი ტესტის ჩატარება;

• უარყოფითი (Negative) - ინფექცია ნაკლებად სავარაუდოა. თუმცა, ადრეულ ეტაპზე ("სეროლოგიური ფანჯარა"), იმუნოსუპრესიის ან ზოგჯერ ხანდაზმულებში შესაძლოა ცრუ უარყოფითი შედეგი;

• საეჭვო (Borderline / Equivocal) - რეკომენდებულია კვლევის გამეორება 2-4 კვირის შემდეგ და დამატებითი მეთოდების გამოყენება.

მნიშვნელოვანია, რომ წარმატებული ერადიკაციული თერაპიის შემდეგაც IgG ანტისხეულები შესაძლოა დადებითი დარჩეს რამდენიმე თვიდან წლამდე, ამიტომ სეროლოგია არ არის რეკომენდებული მკურნალობის ეფექტიანობის შესაფასებლად.

ლაბორატორიული კვლევის შედეგები ყოველთვის უნდა შეფასდეს ექიმის მიერ პაციენტის სამედიცინო ისტორიასთან, რადიოლოგიურ და სხვა გამოკვლევებთან ერთად.