ესტროგენი არის სასქესო ჰორმონი, რომელიც აუცილებელია ქალის სექსუალური და რეპროდუქციული ჯანმრთელობის შესანარჩუნებლად. ესტროგენის დონე ბუნებრივად მერყეობს მენსტრუალური ციკლის დროს და მცირდება მენოპაუზის პერიოდში. ადამიანის ორგანიზმში ძირითადი გხვდება 3 ბიოლოგიურად აქტიური ესტროგენი - ესტრონი (E1), ესტრადიოლი (E2, 17-β ესტრადიოლი) და ესტრიოლი (E3).

ესტრიოლი (E3) ერთ-ერთი ესტროგენია, რომელის კონცენტრაციაც განსაკუთრებულად იზრდება ორსულობის დროს და ხდება დომინანტური ესტროგენი. ნაყოფის თირკმელზედა ჯირკვალი გამოყოფს დეჰიდროეპიანდროსტერონ-სულფატს (DHEAS), რომელიც პლაცენტაში გარდაიქმნება E3-ად და დიფუზირდება დედის სისხლის მიმოქცევაში. E3 დონე იზრდება მთელი ორსულობის განმავლობაში, პიკს აღწევს მშობიარობის ვადაზე. ესტრიოლის დონეს საზღვრავენ ნაყოფის ქრომოსომული პათოლოგიების გამოსარიცხად (სამმაგი ტესტი - AFP, BHCG-სთან ერთად).