კვლევის შესახებ
ექინოკოკის (Echinococcus granulosus) საწინააღმდეგო IgG ანტისხეულების განსაზღვრა არის სისხლის კვლევა, რომელიც აფასებს ორგანიზმის იმუნურ პასუხს პარაზიტ ექინოკოკის მიმართ. Echinococcus granulosus არის ლენტისებრი ჭია, რომელიც ადამიანში იწვევს ექინოკოკოზს (ჰიდატიდურ დაავადებას) - დაავადებას, რომლის დროსაც ორგანოებში (ყველაზე ხშირად - ღვიძლსა და ფილტვებში) წარმოიქმნება სითხით სავსე ექინოკოკური კისტები (ჰიდატიდური კისტები).
ადამიანი ინფიცირდება პარაზიტის კვერცხების შემთხვევით ინესტიციით - ჩვეულებრივ, ინფიცირებულ ძაღლებთან კონტაქტისას ან დაბინძურებული საკვების/წყლის მეშვეობით. ექინოკოკოზი უფრო ხშირია სოფლის მეურნეობისა და მესაქონლეობით დაკავებულ რეგიონებში.
IgG კლასის ანტისხეულები ორგანიზმში პარაზიტთან კონტაქტის შემდეგ გამომუშავდება. ეს კვლევა გამოიყენება ჰიდატიდური დაავადების დიაგნოსტიკის დამხმარე მეთოდად - განსაკუთრებით მაშინ, როდესაც ვიზუალური გამოკვლევებით (ულტრაბგერითი კვლევა, კომპიუტერული ტომოგრაფია) უკვე გამოვლენილია კისტური წარმონაქმნი და საჭიროა მისი ბუნების დაზუსტება. კვლევა ასევე გამოიყენება მკურნალობის შემდგომ დაავადების რეციდივის გამოსავლენად.
რა შემთხვევაში უნდა ჩაიტაროთ კვლევა?
კვლევის ჩატარება რეკომენდებულია შემდეგ შემთხვევებში:
• ვიზუალური გამოკვლევით (ულტრაბგერითი კვლევა, კომპიუტერული ტომოგრაფია, მაგნიტურ-რეზონანსული ტომოგრაფია) ღვიძლში, ფილტვებში ან სხვა ორგანოში კისტური წარმონაქმნის გამოვლენა;
• მუცლის მარჯვენა ზედა მიდამოს ხანგრძლივი დისკომფორტი ან ტკივილი (ღვიძლის კისტის შესაძლო ნიშანი);
• აუხსნელი ხველა, გულმკერდის ტკივილი (ფილტვის კისტის შესაძლო ნიშანი);
• ექინოკოკოზის გავრცელების მაღალი რისკი (მესაქონლეობით დაკავებულ რეგიონებში ცხოვრება, ძაღლებთან ხშირი კონტაქტი);
• ჰიდატიდური დაავადების გამო ჩატარებული მკურნალობის (ქირურგიული ან მედიკამენტოზური) შემდგომი მონიტორინგი რეციდივის გამოსავლენად;
• კისტური წარმონაქმნების დიფერენციალური დიაგნოსტიკა (ჰიდატიდური კისტის გარჩევა მარტივი კისტისგან, აბსცესისგან ან სიმსივნისგან).
ინტერპრეტაცია
ექინოკოკის საწინააღმდეგო IgG ანტისხეულების მომატებული (დადებითი) მაჩვენებელი შესაძლოა მიუთითებდეს:
• ექინოკოკოზით მიმდინარე ან წარსულში გადატანილ ინფექციაზე;
• ღვიძლის, ფილტვის ან სხვა ორგანოს ექინოკოკურ (ჰიდატიდურ) კისტაზე.
ექინოკოკის საწინააღმდეგო IgG ანტისხეულების უარყოფითი (ნორმის ფარგლებში) მაჩვენებელი შესაძლოა მიუთითებდეს:
• ინფექციის არარსებობაზე.
მნიშვნელოვანია გასათვალისწინებელი:
• დადებითი შედეგი არ განასხვავებს აქტიურ და არააქტიურ (კალცინირებულ) კისტას, ამიტომ შედეგი ყოველთვის უნდა შეფასდეს ვიზუალიზაციურ (რადიოლოგიურ) კვლევებთან ერთად;
• უარყოფითი შედეგი სრულად არ გამორიცხავს ჰიდატიდურ დაავადებას - კისტის ლოკალიზაციის, სტადიის ან მთლიანობის მიხედვით შესაძლებელია ცრუუარყოფითი შედეგი;
• IgG ანტისხეულები შესაძლოა დიდხანს, ზოგჯერ მკურნალობის შემდეგაც ნარჩუნდებოდეს;
• შესაძლებელია ჯვარედინი რეაქტიულობა სხვა პარაზიტული ინფექციების დროს, რაც იწვევს ცრუდადებით შედეგს.
ლაბორატორიული კვლევის შედეგები ყოველთვის უნდა შეფასდეს ექიმის მიერ პაციენტის სამედიცინო ისტორიასთან (ანამნეზურ მონაცემებთან) და სხვა გამოკვლევების შედეგებთან ერთად.
კვლევასთან ერთად ასევე ხშირად იტარებენ შემდეგ გამოკვლევებს:
• ფასციოლას საწინააღმდეგო IgG ანტისხეულების განსაზღვრა სისხლში (Fasciola IgG);
• ტოქსოკარას საწინააღმდეგო IgG ანტისხეულების განსაზღვრა სისხლში (Toxocara IgG);
• იმუნოგლობულინ E-ის განსაზღვრა სისხლში (IgE);
• სისხლის საერთო ანალიზი, ედს (CBC+ESR);
• ღვიძლის ფუნქციური სინჯები (ALT, AST, GGT, ALP, TBIL, DBIL);
• C-რეაქტიული ცილის განსაზღვრა სისხლის შრატში, რაოდენობრივი (CRP).
როგორ მოვემზადოთ კვლევისთვის?
კვლევისთვის სპეციალური მომზადება არ არის საჭირო.
ტესტის მეთოდოლოგია
მასალის ტიპი
კვლევის შესრულების დრო
ქვეყანა
ავტორი და წყარო
გამოყენებული წყაროები:
• mayocliniclabs.com - Echinococcus Antibody, IgG, Serum
• ncbi.nlm.nih.gov - Immunodiagnosis of human hydatid disease
• ნინო ღულათავა - სამედიცინო დირექტორი;
• ნინო მურადაშვილი - ჰემატოლოგიის, ბიოქიმიის და იმუნოლოგიის მიმართულების ხელმძღვანელი;
• ლევან არჯევანიძე - კომერციული დირექტორი.
