აღნიშნული გენური პანელი აერთიანებს ფილტვის სიმსივნის ტიპირებისა და მკურნალობის განსაზღვრისათვის საჭირო უმნიშვნელოვანესი გენების კვლევას. EGFR - ეპიდერმული ზრდის ფაქტორის რეცეპტორია, მისი გამააქტივებელი მუტაციები იწვევს უჯრედების გამრავლების სტიმულირებას. EGFR-მუტანტური სიმსივნეებისათვის მოწოდებულია თერაპია თიროზინ-კინაზას ინჰიბიტორებით (ე.წ. ანტი-EGFR თერაპია). გასათვაისწინებელია, რომ EGFR ზოგიერთი მუტაცია პირიქით, მკურნალობისადმი რეზისტენტობას განსაზღვრავს. ეს მუტაციები ზოგიერთ შემთხვევაშო ანტი-EGFR მკურნალობის ფონზე ვითარდება და ამის გამო შესაძლებელია, დაავადების მიმდინარეობის პროცესში EGFR განმეორებითი ტესტირება გახდეს საჭირო. ALK, ROS1, RET, MET გენების ტრანსლოკაციები ასევე მნიშვნელოვანია ფილტვის სიმსივნეების ოპტიმალური მკურნალობის შესარჩევად. ამ გენების შემთხვევაში მუტაციის ხშირი ფორმა არის ტრანსლოკაცია - ანუ გენების გადანაცვლება, რაც იწვევს მათ შერწყმას სხვა პარტნიორ გენებთან. ამის შედეგად ვითარდება თვისობრივად ახალი ტიპის ცილები, რომლებიც ხელს უწყობს ონკოგენეზს.