შედეგი უარყოფითი:

სპეციფიკური ზოლების რაოდენობა არასაკმარისია დადებით შედეგად შესაფასებლად. ეს არ ადასტურებს ბორელიოზს. ცრუ უარყოფითი შედეგის შესაძლო მიზეზებია:

• ინფიცირებიდან ძალიან მცირე დრო გასული - IgG ანტისხეულები ჯერ არ ჩამოყალიბებულა (ე.წ. „ფანჯრის პერიოდი“); ადრეულ სტადიაზე უფრო ინფორმატიულია IgM ბლოტი;

• ანტიბიოტიკოთერაპია ჩატარებული ინფექციის ძალიან ადრეულ ეტაპზე, რამაც შეაფერხა იმუნური პასუხის განვითარება;

• იმუნოსუპრესია.

კლინიკური ეჭვის შენარჩუნებისას რეკომენდებულია კვლევის გამეორება 2-4 კვირის შემდეგ.

შედეგი დადებითი:

გამოვლენილია საკმარისი რაოდენობის სპეციფიკური ზოლი, რაც მიუთითებს Borrelia burgdorferi-სთან შეხებაზე - ახლანდელ ან წარსულში გადატანილ ინფექციაზე. ინტერპრეტაცია:

• დამახასიათებელი კლინიკური სურათისა და ეპიდემიოლოგიური ანამნეზის (ტკიპის ნაკბენი, ენდემურ ზონაში ყოფნა) ფონზე შედეგი ადასტურებს ლაიმის ბორელიოზს;

• დაავადების გვიან სტადიაზე (ართრიტი, ნევროლოგიური ან კარდიოლოგიური გამოვლინებები) IgG ბლოტი ძირითადი დამადასტურებელი ტესტია;

• IgG ანტისხეულები შესაძლოა თვეების ან წლების განმავლობაში დარჩეს დადებითი განკურნების შემდეგაც - ამიტომ დადებითი შედეგი დამოუკიდებლად არ ნიშნავს აქტიურ ინფექციას;

• ტესტი არ გამოიყენება მკურნალობის ეფექტიანობის შესაფასებლად; მკურნალობის შემდეგ კვლევის გამეორება რეკომენდებული არ არის.

შედეგი: ცალკეული ზოლების გამოვლენა (არასაკმარისი დადებითი კრიტერიუმისთვის):

ზოგიერთი ზოლი შესაძლოა გამოვლინდეს ჯვარედინი რეაქციის შედეგად - ანუ სხვა მიკროორგანიზმის საწინააღმდეგო ანტისხეულებმა შეიძლება ბორელიის მსგავს ცილას მიაკითხოს (დაუკავშირდეს). ასეთი შედეგი დადებითად არ ითვლება.

ჯვარედინი რეაქცია და ცრუ დადებითი შედეგები შესაძლებელია, გამოვლინდეს შემდეგ შემთხვევებში:

• სხვა სპიროქეტული ინფექციები (სიფილისი, ლეპტოსპიროზი, ტკიპისმიერი დაბრუნებადი ცხელება);

• ეპშტაინ-ბარის ვირუსით და ციტომეგალოვირუსით გამოწვეული ინფექციები;

• ავტოიმუნური დაავადებები (რევმატოიდული ართრიტი, სისტემური წითელი მგლურა);

• ჰელიკობაქტერ პილორით და ზოგიერთი სხვა ბაქტერიით გამოწვეული ინფექცია;

• პაროდონტის დაავადებები.

მნიშვნელოვანია გვახსოვდეს, რომ ვესტერნბლოტი მხოლოდ ორსაფეხურიანი ალგორითმის ფარგლებში, დადებითი ან საეჭვო სკრინინგული ტესტის შემდეგ არის ინფორმატიული. მისი დამოუკიდებლად, სკრინინგის გვერდის ავლით გამოყენება ცრუ დადებითი შედეგების რაოდენობას მკვეთრად ზრდის.

ლაბორატორიული კვლევის შედეგები ყოველთვის უნდა შეფასდეს ექიმის მიერ პაციენტის სამედიცინო ისტორიასთან (ანამნეზურ მონაცემებთან) და სხვა გამოკვლევების შედეგებთან ერთად.

• ბორელიას საწინააღმდეგო IgG ანტისხეულები სისხლში (Borrelia burgdorferi IgG);

• ბორელიას საწინააღმდეგო IgM ანტისხეულების განსაზღვრა სისხლში (Borrelia burgdorferi IgM);

• ლიქვორის ფიზიკურ-ბიოქიმიური თვისებები და მიკროსკოპული გამოკვლევა;

• სისხლის საერთო ანალიზი, ედს (CBC+ESR);

• C-რეაქტიული ცილის განსაზღვრა სისხლის შრატში, რაოდენობრივი (CRP);

• ერითროციტების დალექვის სიჩქარის განსაზღვრა (ESR);

• ღვიძლის ფუნქციური სინჯები (ALT, AST, GGT, ALP, TBIL, DBIL);

• რევმატოიდული ფაქტორის განსაზღვრა სისხლში (RF);

• ანტინუკლეარული ანტისხეულები (ANA);

• Treponema pallidum-ის (სიფილისი) საწინააღმდეგო ანტისხეულების განსაზღვრა შრატში (anti-Treponema pallidum);

• ეპშტაინ-ბარის ვირუსის საწინააღმდეგო IgG ანტისხეულების განსაზღვრა სისხლში (EBV IgG);

• ციტომეგალოვირუსის საწინააღმდეგო IgG ანტისხეულების განსაზღვრა სისხლში (CMV IgG).

გამოყენებული წყაროები:

• cdc.gov - Standard Two-Tiered Testing: Suggested Results Reporting and Interpretation

• medlineplus.gov - Lyme Disease Tests

• ncbi.nlm.nih.gov - Immunoblot Criteria for Diagnosis of Lyme Disease: A Comparison of CDC Criteria to Alternative Interpretive Approaches

• ნინო ღულათავა - სამედიცინო დირექტორი;

• ნინო მურადაშვილი - ჰემატოლოგიის, ბიოქიმიის და იმუნოლოგიის მიმართულების ხელმძღვანელი;

• ლევან არჯევანიძე - კომერციული დირექტორი.