კვლევის შესახებ
პარვოვირუს B19-ის საწინააღმდეგო IgM ანტისხეულების განსაზღვრა არის სისხლის კვლევა, რომელიც აფასებს ორგანიზმის იმუნურ პასუხს პარვოვირუს B19-ის მიმართ. ეს ვირუსი არის ე.წ. „მეხუთე დაავადების“ (ინფექციური ერითემის) გამომწვევი - მსუბუქი ვირუსული ინფექციისა, რომელიც სახეზე დამახასიათებელი წითელი გამონაყარით ვლინდება და ყველაზე ხშირად ბავშვებში გვხვდება.
IgM კლასის ანტისხეულები არის ის ანტისხეულები, რომლებსაც ორგანიზმი პირველადი ინფექციაზე საპასუხოდ გამოიმუშავებს. პარვოვირუს B19-ის საწინააღმდეგო IgM ანტისხეულების გამოვლენა მიუთითებს ბოლოდროინდელ ან მიმდინარე ინფექციაზე. დროთა განმავლობაში IgM-ის ტიტრი თანდათან იკლებს და გარკვეული ხნის შემდეგ დეტექციის ზღვარს ქვემოთ ეცემა.
პარვოვირუს B19-ის IgM კვლევა ხშირად ტარდება IgG კვლევასთან ერთად: ორივე ანტისხეულის ერთობლივი შეფასება საშუალებას იძლევა გაიმიჯნოს მიმდინარე, ბოლოდროინდელი და წარსულში გადატანილი ინფექცია.
რა შემთხვევაში უნდა ჩაიტაროთ კვლევა?
კვლევის ჩატარება რეკომენდებულია შემდეგ შემთხვევებში:
• პარვოვირუს B19-ის მწვავე (ახალი) ინფექციის ეჭვი - სახეზე დამახასიათებელი წითელი გამონაყარი, ცხელება, თავის ტკივილი;
• ხანგრძლივი სახსრების ტკივილი ან შეშუპება, რომელიც სავარაუდოდ პარვოვირუსით არის გამოწვეული;
• ორსულ ქალში პარვოვირუსით დაავადებულ ადამიანთან კონტაქტი ან ნაყოფის მდგომარეობის ცვლილება;
• მწვავე ანემიის (განსაკუთრებით - წითელი უჯრედების წარმოქმნის დარღვევით გამოწვეული) მიზეზის გარკვევა;
• პარვოვირუს B19-ის ინფექციის ეტაპის (მიმდინარე თუ წარსული) დადგენა IgG კვლევასთან ერთად;
• ქრონიკული ჰემოლიზური ანემიის (მაგ., ნამგლისებურუჯრედოვანი ანემიის) მქონე პაციენტებში მდგომარეობის უეცარი გაუარესება.
ინტერპრეტაცია
პარვოვირუს B19-ის საწინააღმდეგო IgM ანტისხეულების მომატებული (დადებითი) მაჩვენებელი შესაძლოა მიუთითებდეს:
• პარვოვირუს B19-ის მწვავე ან ბოლოდროინდელ ინფექციაზე (ჩვეულებრივ - ბოლო 2-4 თვის განმავლობაში).
პარვოვირუს B19-ის საწინააღმდეგო IgM ანტისხეულების უარყოფითი (ნორმის ფარგლებში) მაჩვენებელი შესაძლოა მიუთითებდეს:
• მწვავე ინფექციის არარსებობაზე;
• კვლევის ძალიან ადრეულ სტადიაზე ჩატარებაზე, როდესაც ანტისხეულების გამომუშავება ჯერ არ არის დასრულებული;
• ინფექციის გადატანიდან ხანგრძლივი დროის გასვლაზე, როდესაც IgM-ის დონე უკვე დაქვეითებულია.
შედეგების ერთობლივი შეფასება:
• თუ გამოვლენილია IgM - ეს მიუთითებს მწვავე ან ბოლოდროინდელ ინფექციაზე;
• თუ გამოვლენილია მხოლოდ IgG (IgM უარყოფითია) - ეს ჩვეულებრივ მიუთითებს წარსულში გადატანილ ინფექციასა და იმუნიტეტზე.
მნიშვნელოვანია გასათვალისწინებელი:
• ანტინუკლეარული ანტისხეულების (ANA) ან ეპშტაინ-ბარის ვირუსის ინფექციის არსებობამ შესაძლოა გამოიწვიოს IgM კვლევის ცრუდადებითი ან საეჭვო შედეგი;
• დასუსტებული იმუნური სისტემის მქონე პირებსა და ახალშობილებში შედეგების ინტერპრეტაცია შესაძლოა გართულდეს;
• ზოგ შემთხვევაში, აქტიური ინფექციის დასადასტურებლად საჭიროა ვირუსის დნმ-ის გამოვლენა (PCR კვლევა).
ლაბორატორიული კვლევის შედეგები ყოველთვის უნდა შეფასდეს ექიმის მიერ პაციენტის სამედიცინო ისტორიასთან (ანამნეზურ მონაცემებთან) და სხვა გამოკვლევების შედეგებთან ერთად.
კვლევასთან ერთად ასევე ხშირად იტარებენ შემდეგ გამოკვლევებს:
• პარვოვირუს B19-ის საწინააღმდეგო IgG ანტისხეულების განსაზღვრა სისხლში (Parvovirus B19 IgG);
• პარვოვირუს B19-ის დნმ-ის განსაზღვრა სისხლში (Parvovirus B19 DNA, PCR);
• სისხლის საერთო ანალიზი, ედს (CBC+ESR);
• რეტიკულოციტების განსაზღვრა სისხლში (RET);
• წითურას ვირუსის საწინააღმდეგო IgG ანტისხეულების განსაზღვრა სისხლში (Rubella IgG).
• წითურას ვირუსის საწინააღმდეგო IgM ანტისხეულების განსაზღვრა სისხლში (Rubella IgM).
როგორ მოვემზადოთ კვლევისთვის?
კვლევისთვის სპეციალური მომზადება არ არის საჭირო.
ტესტის მეთოდოლოგია
მასალის ტიპი
კვლევის შესრულების დრო
ქვეყანა
ავტორი და წყარო
გამოყენებული წყაროები:
• testing.com - Parvovirus B19
• mayocliniclabs.com - Parvovirus B19 Antibodies, IgG and IgM, Serum
• ncbi.nlm.nih.gov - Parvovirus B19: A Clinical and Diagnostic Review
• ნინო ღულათავა - სამედიცინო დირექტორი;
• ნინო მურადაშვილი - ჰემატოლოგიის, ბიოქიმიის და იმუნოლოგიის მიმართულების ხელმძღვანელი;
• ლევან არჯევანიძე - კომერციული დირექტორი.
