ციტომეგალოვირუსის საწინააღმდეგო IgG ანტისხეულების განსაზღვრა სისხლში (CMV IgG)

ფასი: 50 ₾

კვლევის შესახებ

ციტომეგალოვირუსი (Cytomegalovirus, CMV / HHV-5) ჰერპესვირუსების ოჯახის წარმომადგენელია და ზრდასრული მოსახლეობის 40-100% ინფიცირებულია ვირუსით, გეოგრაფიული რეგიონისა და სოციალურ-ეკონომიკური ფაქტორების მიხედვით. პირველადი ინფიცირების შემდეგ ვირუსი მთელი სიცოცხლის მანძილზე რჩება ორგანიზმში ლატენტურ მდგომარეობაში და შესაძლოა გააქტიურდეს იმუნოსუპრესიის დროს.

CMV გადაცემა ხდება ნერწყვით, შარდით, სქესობრივი გზით, სისხლის გადასხმითა და ორგანოთა ტრანსპლანტაციით, ასევე ვერტიკალურად (დედიდან ნაყოფზე).

CMV განსაკუთრებულ საფრთხეს წარმოადგენს:

• ახალშობილებისთვის - თანდაყოლილი CMV-ინფექცია არის თანდაყოლილი ვირუსული ინფექციების ყველაზე გავრცელებული ფორმა და ნეიროგანვითარების დარღვევების, სმენის დაქვეითების წამყვანი არამემკვიდრული მიზეზი;

• იმუნოკომპრომენტირებული პაციენტებისთვის (აივ-ინფიცირებულები, ორგანოთა ტრანსპლანტაციის მიმღებები, ონკოლოგიური პაციენტები) - რეტინიტი, პნევმონიტი, ენცეფალიტი, კოლიტი.

CMV-ის IgG ანტისხეულები სისხლში ჩნდება ინფიცირების 2-3 კვირის შემდეგ, პიკს აღწევს 2-3 თვეში და გრძელვადიანად (სიცოცხლის მანძილზე) ინარჩუნებს მაღალ ტიტრს. IgG-ის დადებითი შედეგი მიუთითებს გადატანილ ინფექციაზე და ჩამოყალიბებულ იმუნიტეტზე.

რა შემთხვევაში უნდა ჩაიტაროთ კვლევა?

კვლევის ჩატარება რეკომენდებულია შემდეგ შემთხვევებში:

• CMV-ინფექციის სტადიის დადგენა (IgM-თან ერთად);

• ორსულობის დაგეგმვა და ორსულობის სკრინინგი (TORCH-ინფექციების პანელი);

• ახალშობილებში თანდაყოლილი ინფექციის სკრინინგი;

• ორგანოთა და ქსოვილების ტრანსპლანტაციამდე - დონორისა და რეციპიენტის სეროლოგიური სტატუსის დადგენა;

• სისხლის და სისხლის კომპონენტების გადასხმის წინ;

• იმუნოსუპრესიული თერაპიის დაწყებამდე სეროლოგიური სტატუსის შეფასება;

• აივ-ინფიცირებული პაციენტები;

• ონკოლოგიური პაციენტები მკურნალობის დაწყებამდე;

• ინფექციური მონონუკლეოზის დიფერენციალური დიაგნოსტიკა.

ინტერპრეტაცია

კვლევის შედეგი შეიძლება იყოს:

• დადებითი (Positive) - მიუთითებს CMV-ით ინფიცირებაზე: გადატანილ ან მიმდინარე ინფექციაზე, ჩამოყალიბებულ იმუნიტეტზე. ორგანიზმში ვირუსი ლატენტურად რჩება;

• უარყოფითი (Negative) - ორგანიზმს არ შეხვედრია CMV. პირი მგრძნობიარეა პირველადი ინფექციის მიმართ;

• საეჭვო (Borderline / Equivocal) - რეკომენდებულია კვლევის გამეორება 2-4 კვირის შემდეგ.

IgM-ისა და IgG-ის ერთობლივი ინტერპრეტაცია:

• IgM (+) / IgG (−) - ახალი (მწვავე) ინფექცია, ადრეული ეტაპი;

• IgM (+) / IgG (+) - მწვავე ან სუბაკუტური ინფექცია, შესაძლო რეაქტივაცია;

• IgM (−) / IgG (+) - გადატანილი ინფექცია, იმუნიტეტი (ლატენტური ვირუსის მატარებელი);

• IgM (−) / IgG (−) - ინფექცია არ გამოვლენილა (პირი მგრძნობიარეა).

ორსულობის დროს IgG-ის დადებითი და IgM-ის უარყოფითი შედეგი უსაფრთხოდ ითვლება, თუმცა ვერტიკალური გადაცემა შესაძლებელია ვირუსის რეაქტივაციის შემთხვევაშიც. IgG ავიდობის ტესტი აზუსტებს, როდის მოხდა პირველადი ინფიცირება, რაც განსაკუთრებით მნიშვნელოვანია ორსულობის 20-ე კვირამდე.

ლაბორატორიული კვლევის შედეგები ყოველთვის უნდა შეფასდეს ექიმის მიერ პაციენტის სამედიცინო ისტორიასთან, რადიოლოგიურ და სხვა გამოკვლევებთან ერთად.