იმუნოფიქსაციური ელექტროფორეზის შედეგი ძირითადად თვისობრივია - ანუ პასუხობს კითხვას, არის თუ არა შრატში მონოკლონური ცილა და თუ არის, რომელი ტიპის.

ნორმალური (პათოლოგიის გარეშე) შედეგი:

მონოკლონური ცილა არ ვლინდება, ან გამოვლენილია ანტისხეულების ნორმალური, მრავალფეროვანი (პოლიკლონური) განაწილება. ეს ჩვეულებრივ ნორმის ვარიანტად ან ანთებითი/ინფექციური პასუხის გამოხატულებად ფასდება.

მონოკლონური ცილის (M-ცილის) გამოვლენა:

სისხლში იდენტური ანტისხეულის ჭარბი რაოდენობა შესაძლოა გამოვლინდეს შემდეგ მდგომარეობებში:

• გაურკვეველი მნიშვნელობის მონოკლონური გამაპათია (MGUS);

• მრავლობითი მიელომა;

• ვალდენსტრემის მაკროგლობულინემია;

• AL-ამილოიდოზი;

• პლაზმოციტომა და სხვა პლაზმურუჯრედოვანი დაავადებები;

• ლიმფოპროლიფერაციული დაავადებები (ცალკეული ლიმფომები, ქრონიკული ლიმფოციტური ლეიკემია).

პოლიკლონური მომატება:

ყველა ტიპის ანტისხეულის ერთდროული, თანაბარი მომატება მონოკლონური ცილის გარეშე ჩვეულებრივ არ მიუთითებს სიმსივნურ პროცესზე და გვხვდება ქრონიკული ინფექციების, ღვიძლის დაავადებების (ჰეპატიტი, ციროზი), აუტოიმუნური დაავადებებისა და ქრონიკული ანთების დროს.

მნიშვნელოვანია, რომ მონოკლონური ცილის გამოვლენა ავტომატურად არ ნიშნავს ავთვისებიან დაავადებას - შემთხვევათა უმეტესობა MGUS-ის სახით ფასდება, რომელიც მოითხოვს მხოლოდ პერიოდულ დაკვირვებას. შედეგი ყოველთვის უნდა შეფასდეს შრატის ცილების ელექტროფორეზის, იმუნოგლობულინების რაოდენობრივი განსაზღვრისა და კლინიკური მონაცემების ერთობლიობაში.

ლაბორატორიული კვლევის შედეგები ყოველთვის უნდა შეფასდეს ექიმის მიერ პაციენტის სამედიცინო ისტორიასთან (ანამნეზთან) და სხვა გამოკვლევების შედეგებთან ერთად.

• შრატის ცილების ელექტროფორეზი (SPEP);

• იმუნოელექტროფორეზი შარდში (ბენს-ჯონსის ცილა შარდში);

• იმუნოგლობულინ G-ის განსაზღვრა სისხლში (IgG);

• იმუნოგლობულინ A-ის განსაზღვრა სისხლში (IgA);

• იმუნოგლობულინ M-ის განსაზღვრა სისხლში (IgM);

• თავისუფალი მსუბუქი ჯაჭვების (ლამბდა) განსაზღვრა შრატში;

• თავისუფალი მსუბუქი ჯაჭვების (კაპა) განსაზღვრა შრატში;

• ß2 -microglobulin, ბეტა-2-მიკროგლობულინი, შრატში;

• სისხლის საერთო ანალიზი, ედს (CBC+ESR);

• კალციუმის განსაზღვრა სისხლში (Ca);

• კრეატინინის განსაზღვრა სისხლის შრატში (Creatinine);

• საერთო ცილის განსაზღვრა სისხლის შრატში (TP);

• საერთო ალბუმინის განსაზღვრა სისხლის შრატში (ALB);

• შარდის საერთო ანალიზი (Urinalysis).

გამოყენებული წყაროები:

• medlineplus.gov - Protein Electrophoresis by Immunofixation Blood Test

• labcorp.com - Immunofixation (IFE), Serum

• aruplab.com - Immunofixation Electrophoresis, Serum

• ნინო ღულათავა - სამედიცინო დირექტორი;

• ნინო მურადაშვილი - ჰემატოლოგიის, ბიოქიმიის და იმუნოლოგიის მიმართულების ხელმძღვანელი;

• ლევან არჯევანიძე - კომერციული დირექტორი.