კვლევის შედეგი შესაძლოა იყოს უარყოფითი ან დადებითი.

უარყოფითი (ნორმალური) შედეგი ნიშნავს, რომ ინკუბაციის სტანდარტული ვადის (2–4 კვირა) განმავლობაში სოკოს ზრდა არ აღინიშნება. ეს მიუთითებს, რომ მოცემულ ნიმუშში არ არსებობს კლინიკურად მნიშვნელოვანი სოკოვანი ინფექცია, თუმცა გასათვალისწინებელია, რომ:

• დერმატომიკოზის შემთხვევაში, განსაკუთრებით - ფრჩხილის სოკოვან ინფექციაში - ცრუუარყოფითი შედეგი 30%-მდე შეადგენს არასწორი ნიმუშის აღების, წინასწარი ლოკალური ან სისტემური ანტიფუნგალური თერაპიის ან დაზიანებული უბნის ცენტრალური ნაწილიდან ნიმუშის აღების გამო;

• რეკომენდებულია კულტურის შედარება პირდაპირ მიკროსკოპიასთან (KOH პრეპარატით), რათა გაიზარდოს დიაგნოსტიკის სანდოობა;

• კლინიკური ეჭვის შენარჩუნების შემთხვევაში, რეკომენდებულია კულტურის გამეორება 4–6 კვირის შემდეგ.

დადებითი შედეგი ნიშნავს, რომ ნიმუშში გამოვლენილია სოკოვანი მიკროორგანიზმი. პასუხში მითითებულია სოკოს გვარი ან სახეობა.

დადებითი შედეგის ინტერპრეტაცია:

• დერმატოფიტების (Trichophyton, Microsporum, Epidermophyton) გამოვლენა ყოველთვის კლინიკურად მნიშვნელოვანია და ადასტურებს დერმატომიკოზის ან ონიქომიკოზის დიაგნოზს;

• Candida albicans ფრჩხილის ანაფხეკში, კლინიკური სიმპტომების ფონზე, ადასტურებს Candida-ს ეტიოლოგიის ონიქომიკოზის დიაგნოზს (განსაკუთრებით - ხელის ფრჩხილებზე);

• არა-დერმატოფიტური ობი სოკოები (Aspergillus, Fusarium, Scopulariopsis) შესაძლოა იყვნენ კონტამინანტები ან ნამდვილი პათოგენები; დიაგნოზის დადასტურებისთვის რეკომენდებულია გამოვლენილი სოკოს განმეორებითი იზოლირება;

• Microsporum canis ხშირად აღინიშნება ბავშვებში tinea capitis-ის ფონზე; ინფექციის წყაროა ცხოველი (განსაკუთრებით - კატა, ძაღლი);

• ანტიფუნგალური თერაპიის შერჩევა დამოკიდებულია გამოვლენილი სოკოს გვარზე და დაზიანების ლოკალიზაციასა და ფართობზე.

ლაბორატორიული კვლევის შედეგები ყოველთვის უნდა შეფასდეს ექიმის მიერ პაციენტის სამედიცინო ისტორიასთან (ანამნეზურ მონაცემებთან) და სხვა გამოკვლევების შედეგებთან ერთად.

• კანის ან ფრჩხილის ანაფხეკის კულტურალური და მიკროსკოპული გამოკვლევა ბაქტერიაზე და ანტიბიოგრამა;

• სისხლის საერთო ანალიზი, ედს (CBC+ESR);

• გლუკოზის განსაზღვრა სისხლში (Glucose);

• გლიკირებული ჰემოგლობინის განსაზღვრა სისხლში (HbA1c);

• ღვიძლის ფუნქციური სინჯები (ALT, AST, GGT, ALP, TBIL, DBIL) - სისტემური ანტიფუნგური თერაპიის წინ;

• კრეატინინის განსაზღვრა სისხლის შრატში (Creatinine);

• იმუნოგლობულინ G-ის განსაზღვრა სისხლში (IgG);

• იმუნოგლობულინ M-ის განსაზღვრა სისხლში (IgM);

• იმუნოგლობულინ A-ის განსაზღვრა სისხლში (IgA);

• იმუნოგლობულინ E-ის განსაზღვრა სისხლში (IgE);

• აივ-ის საწინააღმდეგო ანტისხეულებისა და p24 ანტიგენის კომბინირებული განსაზღვრა სისხლში (HIV Ag/Ab Combo).

გამოყენებული წყაროები:

• ncbi.nlm.nih.gov - Onychomycosis (StatPearls)

• cdc.gov - Ringworm

• aad.org - Nail Fungus: Diagnosis and Treatment

• ნინო მაჭარაშვილი - MS, PhD - მიკრობიოლოგიის მიმართულების ხელმძღვანელი

• ნინო ღულათავა - სამედიცინო დირექტორი

• ლევან არჯევანიძე - კომერციული დირექტორი