ეპშტაინ-ბარის ვირუსის საწინააღმდეგო ანტისხეულების განსაზღვრა, სწრაფი ტესტი (EBV IgM, IgG, EBNA IgG, Heterophile Ab)

ფასი: 50 ₾

კვლევის შესახებ

ეპშტაინ-ბარის ვირუსის საწინააღმდეგო ანტისხეულების განსაზღვრა, სწრაფი ტესტი (EBV IgM, IgG, EBNA IgG, Heterophile Ab) არის სისხლის კომბინირებული კვლევა, რომელიც ერთდროულად აფასებს ორგანიზმის რამდენიმე იმუნურ პასუხს ეპშტაინ-ბარის ვირუსის (EBV) მიმართ. EBV ჰერპესვირუსების ჯგუფს მიეკუთვნება და არის ინფექციური მონონუკლეოზის (ე.წ. „კოცნის დაავადება“) მთავარი გამომწვევი.

კვლევა მოიცავს ოთხ კომპონენტს:

• ჰეტეროფილური ანტისხეულები (Heterophile Ab) - ეს არის ანტისხეულები, რომლებსაც ორგანიზმი EBV-ინფექციაზე საპასუხოდ გამოიმუშავებს; მათი გამოვლენა არის მონონუკლეოზის სწრაფი დიაგნოსტიკის (ე.წ. Monospot ტესტის) საფუძველი;

• VCA IgM - ვირუსის კაფსიდური ანტიგენის საწინააღმდეგო IgM ანტისხეულები, რომლებიც ჩნდება დაავადების დასაწყისში და მიუთითებს მწვავე (ახალ) ინფექციაზე;

• VCA IgG - ვირუსის კაფსიდური ანტიგენის საწინააღმდეგო IgG ანტისხეულები, რომლებიც ინფექციის შემდეგ მთელი სიცოცხლის განმავლობაში ნარჩუნდება;

• EBNA IgG - ვირუსის ბირთვული ანტიგენის საწინააღმდეგო IgG ანტისხეულები, რომლებიც ჩნდება დაავადებიდან 2-4 თვის შემდეგ და მიუთითებს წარსულ ინფექციაზე.

ამ კომპონენტების ერთობლივი შეფასება საშუალებას იძლევა გაიმიჯნოს მწვავე, ბოლოდროინდელი და წარსულში გადატანილი ინფექცია.

რა შემთხვევაში უნდა ჩაიტაროთ კვლევა?

კვლევის ჩატარება რეკომენდებულია შემდეგ შემთხვევებში:

• ინფექციური მონონუკლეოზის ეჭვი (ხანგრძლივი ცხელება, ძლიერი დაღლილობა, ყელის ტკივილი, ლიმფური კვანძების გადიდება);

• ნუშისებრი ჯირკვლების (ტონზილების) ანთება, რომელიც არ ექვემდებარება ანტიბიოტიკოთერაპიას;

• ელენთის ან ღვიძლის გადიდება გაურკვეველი მიზეზით;

• ხანგრძლივი, აუხსნელი დაღლილობა;

• EBV-ინფექციის ეტაპის (მწვავე, ბოლოდროინდელი თუ წარსული) დადგენა;

• სისხლის საერთო ანალიზში ატიპიური (რეაქტიული) ლიმფოციტების გამოვლენა;

• მონონუკლეოზის სიმპტომები, როდესაც საჭიროა გადატანილი და მიმდინარე ინფექციის ერთმანეთისგან გარჩევა.

ინტერპრეტაცია

კვლევის შედეგი ფასდება ოთხივე კომპონენტის ერთობლიობით:

მწვავე (ახალ) EBV-ინფექციაზე ჩვეულებრივ მიუთითებს:

• დადებითი ჰეტეროფილური ანტისხეულები;

• დადებითი VCA IgM;

• დადებითი ან უარყოფითი VCA IgG;

• უარყოფითი EBNA IgG.

წარსულში გადატანილ EBV-ინფექციაზე ჩვეულებრივ მიუთითებს:

• უარყოფითი ჰეტეროფილური ანტისხეულები;

• უარყოფითი VCA IgM;

• დადებითი VCA IgG;

• დადებითი EBNA IgG.

EBV-ინფექციის არარსებობაზე (მგრძნობიარე ორგანიზმზე) მიუთითებს ყველა კომპონენტის უარყოფითი მაჩვენებელი.

მნიშვნელოვანია გასათვალისწინებელი:

• ჰეტეროფილური ანტისხეულების ტესტი („მონოსპოტი“) ხშირად უარყოფითია მცირეწლოვან ბავშვებში და დაავადების ადრეულ ეტაპზე, ამიტომ უარყოფითი შედეგი არ გამორიცხავს ინფექციურ მონონუკლეოზს;

• ჰეტეროფილური ანტისხეულები შესაძლოა გამოვლინდეს სხვა მდგომარეობების დროსაც, რის გამოც შესაძლებელია ცრუდადებითი შედეგი;

• EBNA IgG-ის გამოვლენა დაავადების ადრეულ ეტაპზე პრაქტიკულად გამორიცხავს მწვავე ინფექციას;

• სხვა ვირუსებმა (მაგ., ციტომეგალოვირუსმა) შესაძლოა გამოიწვიოს მსგავსი კლინიკური სურათი და გავლენა მოახდინოს IgM-ის შედეგზე.

ლაბორატორიული კვლევის შედეგები ყოველთვის უნდა შეფასდეს ექიმის მიერ პაციენტის სამედიცინო ისტორიასთან (ანამნეზურ მონაცემებთან) და სხვა გამოკვლევების შედეგებთან ერთად.