HER2-ის (ERBB2) ამპლიფიკაციის განსაზღვრა in situ ჰიბრიდიზაციის (ISH) მეთოდით არის მოლეკულურ-პათოლოგიური კვლევა, რომელიც ქსოვილის სექციაში პირდაპირ ითვლის HER2 გენის ასლების რაოდენობას ნეოპლაზიურ უჯრედებში.

HER2 (ადამიანის ეპიდერმული ზრდის ფაქტორის რეცეპტორი 2) არის პროტოონკოგენი, რომელიც აკონტროლებს უჯრედის ზრდასა და გაყოფას. მისი გენური ამპლიფიკაცია იწვევს HER2 ცილის ჰიპერექსპრესიას უჯრედის ზედაპირზე, რაც ასტიმულირებს სიმსივნის აგრესიულ ზრდას. HER2-ის ამპლიფიკაცია ვლინდება ძუძუს კიბოს შემთხვევათა დაახლოებით 15%-ში, ასევე კუჭისა და გასტროეზოფაგური შესაყარის ადენოკარცინომების ნაწილში. In situ ჰიბრიდიზაცია (ISH/FISH) გამოიყენება HER2 სტატუსის ვალიდაციისთვის მაშინ, როცა იმუნოჰისტოქიმიური (IHC) კვლევის შედეგი ორაზროვანია (2+). კვლევა კრიტიკულად მნიშვნელოვანია ანტი-HER2 სამიზნე თერაპიის (მაგ., ტრასტუზუმაბის) დანიშვნისთვის, რომელიც ეფექტიანია მხოლოდ HER2-დადებითი სიმსივნეების დროს.

ანტინუკლეარული ანტისხეულების განსაზღვრა არაპირდაპირი იმუნოფლუორესცენტული მეთოდით (ANA HEP-2, Indirect Immunofluorescence on HEP-2 cells) არის აუტოიმუნური დაავადებების სკრინინგისა და დიაგნოსტიკის ერთ-ერთი ძირითადი ლაბორატორიული კვლევა. ანტინუკლეარული ანტისხეულები (ANA) წარმოადგენს იმუნოგლობულინებს, რომლებსაც იმუნური სისტემა საკუთარი უჯრედის ბირთვის სხვადასხვა კომპონენტის (დნმ, ჰისტონები, ბირთვის გარსის ცილები, რიბონუკლეოპროტეინები, ცენტრომერი, ნუკლეოლუსი) წინააღმდეგ აწარმოებს.

HEP-2 უჯრედული ხაზი (ადამიანის ეპითელური კარცინომის უჯრედები) მსოფლიოს მასშტაბით აღიარებულია ANA-ს გამოვლენის „ოქროს სტანდარტად“. არაპირდაპირი იმუნოფლუორესცენციის მეთოდი იძლევა შესაძლებლობას გამოვლინდეს როგორც ანტისხეულების ტიტრი, ისე მათი ფლუორესცენციის სურათი (პატერნი): ერთგვაროვანი (homogeneous), მარცვლოვანი (speckled), ნუკლეოლარული (nucleolar), ცენტრომერული (centromeric), წერტილოვანი (dots), ბირთვის გარსოვანი (nuclear envelope) და სხვ. - რაც მიანიშნებს კონკრეტული ავტოანტისხეულის ტიპზე და დაკავშირებულ კლინიკურ მდგომარეობაზე.

დადებითი ANA-ს შედეგი არ ნიშნავს აუტოიმუნური დაავადების არსებობას - ის ვლინდება ჯანმრთელი მოსახლეობის დაახლოებით 5-15%-ში, განსაკუთრებით ხანდაზმულ ასაკში; შესაბამისად, ANA-ს ინტერპრეტაცია ყოველთვის უნდა მოხდეს კლინიკურ კონტექსტში და სხვა სპეციფიკურ ანტისხეულებთან კომბინაციაში.