კვლევის შედეგი შესაძლოა იყოს უარყოფითი ან დადებითი.

უარყოფითი შედეგი ნიშნავს, რომ ვაგინალური ნაცხის მიკროსკოპული ან/და კულტურალური გამოკვლევით სოკოვანი ელემენტები (საფუარისებრი უჯრედები, ფსევდოჰიფები) ან Candida-ს გვარის სოკოს ზრდა არ ვლინდება. ეს მიუთითებს, რომ კლინიკური სიმპტომები, სავარაუდოდ, არ არის სოკოვანი წარმოშობის და ვითარდება სხვა მიზეზით (ბაქტერიული ვაგინოზი, ტრიქომონიაზი, ატროფიული ვაგინიტი, ალერგიული რეაქცია, ქიმიური გაღიზიანება). ცრუუარყოფითი შედეგი შესაძლებელია წინასწარი ანტიფუნგალური თერაპიის, არასწორი ნიმუშის აღების ან არასაკმარისი სოკოვანი დატვირთვის გამო.

დადებითი შედეგი ნიშნავს, რომ ნაცხში გამოვლენილია სოკოვანი ელემენტები (საფუარისებრი უჯრედები, ფსევდოჰიფები, ნამდვილი ჰიფები) ან კულტურის შემთხვევაში - სოკოს ზრდა. პასუხში მითითებულია გამოვლენილი სოკოს გვარი ან სახეობა.

დადებითი შედეგის ინტერპრეტაცია:

• კოლონიზაცია vs. ინფექცია: Candida-ს გვარის სოკოები ნორმაში შესაძლოა ვაგინალური ფლორის ნაწილი იყოს ქალთა 20–30%-ში, კლინიკური სიმპტომების გარეშე; ასეთ შემთხვევაში მკურნალობა საჭირო არ არის (გარდა ორსულობის III ტრიმესტრისა, სადაც ანტიფუნგალური თერაპია შესაძლოა იყოს ნაჩვენები გადაცემის თავიდან ასაცილებლად);

• სიმპტომური კანდიდოზი - კლინიკური სიმპტომების ფონზე Candida-ს გამოვლენა საჭიროებს მკურნალობას;

• Candida albicans - ხშირად ფლუკონაზოლისადმი მგრძნობიარეა; სტანდარტული თერაპიის შერჩევა ხშირად შესაძლებელია მგრძნობელობის ტესტამდე;

• Candida glabrata და Candida krusei - ხშირად ფლუკონაზოლისადმი რეზისტენტობას ავლენენ; საჭიროებენ ალტერნატიული თერაპიის (ბორის მჟავა, ლოკალური ბუტოკონაზოლი, ნისტატინი) გამოყენებას;

• რეციდიული ან ანტიფუნგალური თერაპიის მიმართ რეზისტენტული ვაგინიტი - მოითხოვს ანტიფუნგოგრამის შეკვეთას და რისკფაქტორების შეფასებას (განსაკუთრებით - დიაბეტი, იმუნოდეფიციტი);

• ფსევდოჰიფების გამოვლენა მიკროსკოპიით უფრო სპეციფიკური ნიშანია აქტიური ინფექციისთვის, ვიდრე მხოლოდ საფუარისებრი უჯრედები.

ლაბორატორიული კვლევის შედეგები ყოველთვის უნდა შეფასდეს ექიმის მიერ პაციენტის სამედიცინო ისტორიასთან (ანამნეზურ მონაცემებთან) და სხვა გამოკვლევების შედეგებთან ერთად.

• შარდის კულტურალური გამოკვლევა სოკოზე;

• შარდის საერთო ანალიზი (Urinalysis);

• სისხლის საერთო ანალიზი, ედს (CBC+ESR);

• გლუკოზის განსაზღვრა სისხლში (Glucose);

• გლიკირებული ჰემოგლობინის განსაზღვრა სისხლში (HbA1c);

• იმუნოგლობულინ G-ის განსაზღვრა სისხლში (IgG);

• იმუნოგლობულინ M-ის განსაზღვრა სისხლში (IgM);

• იმუნოგლობულინ A-ის განსაზღვრა სისხლში (IgA);

• იმუნოგლობულინ E-ის განსაზღვრა სისხლში (IgE);

• აივ-ის საწინააღმდეგო ანტისხეულებისა და p24 ანტიგენის კომბინირებული განსაზღვრა სისხლში (HIV Ag/Ab Combo);

• ქლამიდია ტრაქომატის საწინააღმდეგო IgG ანტისხეულების განსაზღვრა სისხლში (Chlamydia trachomatis IgG);

• ქლამიდია ტრაქომატის საწინააღმდეგო IgA ანტისხეულების განსაზღვრა სისხლში (Chlamydia trachomatis IgA);

• მარტივი ჰერპესვირუსის საწინააღმდეგო IgG ანტისხეულების განსაზღვრა სისხლში (HSV-1/2 IgG);

• მარტივი ჰერპესვირუსის საწინააღმდეგო IgM ანტისხეულების განსაზღვრა სისხლში (HSV-1/2 IgM).

გამოყენებული წყაროები:

• cdc.gov - Vulvovaginal Candidiasis (STI Treatment Guidelines)

• ncbi.nlm.nih.gov - Vaginal Candidiasis (StatPearls)

• acog.org - Vaginitis in Nonpregnant Patients

• ნინო მაჭარაშვილი - MS, PhD - მიკრობიოლოგიის მიმართულების ხელმძღვანელი

• ნინო ღულათავა - სამედიცინო დირექტორი

• ლევან არჯევანიძე - კომერციული დირექტორი